मैत्रिणी समवेत वाढदिवस साजरा करायला जाताना युवतीचा अपघाती मृत्यू

वाढदिवसाचा केक कापताना जान्हवी काकडे

Accidental death of a young woman while going to celebrate a birthday with her friend

        फलटण (गंधवार्ता वृत्तसेवा) :-  मंगळवार पेठ, फलटण येथील  तेवीस वर्षीय युवती  आपला  वाढदिवस मैत्रिणी समवेत साजरा करण्यासाठी केकसह मैत्रिणीकडे जात असतानाच, विडणी येथे झालेल्या अपघातात तिचा मृत्यू झाला. पदव्युत्तर शिक्षण घेतलेल्या जान्हवीच्या अपघाती मृत्यूची खबर समजताच कुटुंबियांसह  मंगळवार पेठेवर शोककळा पसरली. सर्वत्र हळहळ व्यक्त करण्यात आली. 

        फलटण ग्रामीण पोलिसांनी दिलेल्या माहितीनुसार, पर्णवी उर्फ जान्हवी संजय काकडे (वय - २३, रा.मंगळवार पेठ फलटण) ही युवती आज दुपारी २ च्या सुमारास फलटणहुन विडणीकडे आपला वाढदिवस साजरा करण्यासाठी आपल्या मैञीणीकडे दुचाकीवरून जात होती. त्यावेळी विडणी गावच्या हद्दीतील अब्दागिरे वस्ती येथे तीच्या दुचाकीला भरधाव वेगात आलेल्या ट्रॅक्टर नंबर एमएच.४५.एस.३३७२ ने ओव्हरटेक करताना मागील ट्रॉलीची धडक बसली यामध्ये जान्हवी संजय काकडे ही गंभीर जखमी झाली. जान्हवी हिस रुग्णालयामध्ये दाखल करण्यात आले परंतू उपचारादरम्यान तीचा मृत्यू झाला. या अपघातातील ट्रॅक्टर चालक हा अपघातानंतर घटनास्थळावरून ट्रॅक्टर घेऊन फरार झाला असून या अपघाताचा तपास पोलीस उपनिरीक्षक उस्मान शेख करीत आहेत.

घटनास्थळावर पडलेली गाडी

       जान्हवी काकडे हीने एमएस्सी ॲग्रीची पदवी घेतली होती. तीने बीएस्सी ॲग्री फलटणच्या शेती महाविद्यालयात तर एमएस्सी पदवीचे शिक्षण तिने पुणे येथे पूर्ण केले होते.  सध्या ती यूपीएससी स्पर्धा परीक्षेचा अभ्यास करत होती. तिने नुकतीच यूपीएससीची प्रिलियम परीक्षा देखील दिली होती. 

      दरम्यान जान्हवीचा मित्र परिवार मोठा होता. ३१ डिसेंबर रोजी रात्री १२ वाजता, घरच्यांनी व मित्रपरिवाराने तीचा वाढदिवस जल्लोषात साजरा करून जान्हवीला शुभेच्छा दिल्या होत्या.  दुपार पर्यंत अनेकांनी सोशल मिडीयावर तीला वाढदिवसाच्या शुभेच्छाही दिल्या होत्या.  परंतू वाढदिवसा दिवशीच तिचा मृत्यू झाल्याने शुभेच्छांचा वर्षाव केलेल्यांना जान्हवीस श्रध्दांजली वाहण्याची दुर्दैवी वेळ नातलग व मित्रपरिवावर आली त्यामुळे सर्वत्र हळहळ व्यक्त होत आहे.