कत्तलीसाठी जनावरे घेऊन जाणारी पिकअप पोलिसांच्या ताब्यात

 

Pickup carrying animals for slaughter in police custody

        फलटण-शिंगणापूर रस्त्यावरील सोनवडी बु. ता. फलटण गावच्या हद्दीत ग्रामीण पोलीसांनी टाकलेल्या छाप्यात  कत्तलीच्या उद्देशाने जनावरे  घेवून जात असलेली पिकअप पोलीसांनी ताब्यात घेतली असून या घटनेत दोन लाख ३२ हजार रुपयांचा मुद्देमाल जप्त करण्यात आला आहे.

       या बाबत फलटण ग्रामीण पोलिस ठाण्यातून मिळालेली माहिती अशी की, शनिवार दि. १३ मार्च रोजी दुपारी दिडच्या सुमारास सोनवडी बु. येथील सोनवडी ते विडणी रस्त्यावर शेख वस्ती येथे ग्रामीण पोलीसांनी टाकलेल्या छाप्यात पिकअप गाडी क्रमांक एमएच ११ ऐजी ९४७० मध्ये कत्तलीसाठी नेण्यात येत असलेली एक जर्सी गाय व वासरू, दोन देशी गायी व वासरु मिळून आली. पोलीसांची चाहूल लागताच गाडीचा चालक पसार झाला आहे. पोलीसांनी या प्रकरणी वरील वर्णनाची ३२ हजार रुपयांची जनावरे व दोन लाख रुपये किंमतीची पिकअप असा एकूण दोन लाख ३२ हजार रुपयांचा मुद्देमाल जप्त केला आहे. या घटनेची फिर्याद सदाशिव जालिंदर कुंभार वय ५१ रा. झिरपवाडी ता. फलटण यांनी फलटण ग्रामीण पोलीस ठाण्यात दिली आहे. पुढील तपास पोलीस हवालदार आर बी लिमण हे करित आहेत.

       सदर कारवाईमध्ये जप्त करण्यात आलेली जनावरे गोशाळेमध्ये पालनपोषणासाठी जमा करण्यात आली असल्याची माहिती पोलिस निरीक्षक नितिन सावंत यांनी दिली आहे.