गाव पातळीवर कोव्हीड सेंटर सुरू केली तर निश्चित आपण यातून बाहेर पडू - श्रीमंत रामराजे नाईक निंबाळकर

If we start Covid Center at the village level, we will definitely get out of this - Shrimant Ramraje Naik Nimbalkar

    गंधवार्ता वृत्तसेवा, फलटण दि. २१ मे २०२१ - नागरिकांनी कोरोनाची थोडीशी जरी लक्षणे दिसली,  तरी डॉक्टरकडे जाणे गरजेचे आहे, तर आपण त्यावर योग्य उपचार करू शकतोय.  ग्रामीण भागामध्ये गृह विलीगीकरणाची सोय नसल्याने, नियम पाळणे शक्य होत नाहीत. परंतु कोव्हीड केअर सेंटर आपण जर व्यवस्थित करून घेतली आणि गाव पातळीवर जर कोव्हीड सेंटर सुरू केली गेली तर  निश्चित आपण यातून बाहेर पडू असा विश्वास विधानपरिषदेचे सभापती श्रीमंत रामराजे नाईक निंबाळकर यांनी व्यक्त केला.

साठे ता. फलटण येथील कोरोना केअर सेंटरच्या उद्घाटन प्रसंगी श्रीमंत रामराजे नाईक निंबाळकर, आमदार दीपक चव्हाण, श्रीमंत संजीवराजे नाईक निंबाळकर, श्रीमंत शिवरूपराजे खर्डेकर निंबाळकर व इतर

    साठे ता. फलटण येथील लक्ष्मी नारायण लॉन्स मंगल कार्यालय येथे लोकसहभागातून सुरू करण्यात आलेल्या कोरोना केअर सेंटरचे उद्घाटन विधानपरिषदेचे सभापती श्रीमंत रामराजे नाईक निंबाळकर यांच्या हस्ते संपन्न झाले. या वेळी श्रीमंत रामराजे नाईक निंबाळकर बोलत होते. याप्रसंगी आमदार दीपक चव्हाण, श्रीमंत संजीवराजे नाईक निंबाळकर, श्रीमंत शिवरूपराजे खर्डेकर निंबाळकर, सौ. रेखा खरात, तहसीलदार समीर यादव, गटविकास अधिकारी डॉ. अमिता गावडे, बापूराव गावडे, सौ. राजश्री माने, विक्रमसिंह जाधव, मनोज गावडे, बजरंग खटके, संजय कापसे यांच्यासह मान्यवर उपस्थित होते.

    पुढे बोलताना श्रीमंत रामराजे म्हणाले की, कोव्हीड मधून बाहेर पडल्यानंतर रुग्णांची रोगप्रतिकारक शक्ती कमी होते व त्यानंतर दुसरे इन्फेक्शन होण्याची शक्यता असते, तरी नागरिकांनी घाबरून जाण्याचे कारण नाही. त्याच्यावर औषध उपचार आहेत, परंतु ती औषधे महाग आहेत. त्यादृष्टीने माझे कार्य चालू  आहे. सध्या माझ्या डोळ्यापुढे दोन गोष्टी आहेत, पहिली कोव्हीड आणि कोव्हीडला लागणारी औषधे व ऑक्सिजन आणि दुसरी कोव्हीड नंतर जे डोळ्याचे इन्फेक्शन (काळी बुरशी) निघालेले आहे, त्याच्या दृष्टीने आपल्याला सामना करण्यासाठी जी औषधे लागतील, जरी ती महाग असली, तरी ती कशी स्वस्त करता येतील, त्या दृष्टीने काम चालू असल्याचे श्रीमंत रामराजे यांनी सांगितले.

     नागरिकांनी कोरोना काळात काळजी घ्यावी, घरी राहावे, माहिती कळवा आणि   आवश्यक असेल त्यावेळी मला फोन करा, मी जरी उपलब्ध नसलो तरी श्रीमंत संजीवराजे असतात त्यांच्याशी संपर्क साधावा, त्याचबरोबर शिवरूपराजे, आमदार दीपक चव्हाण यांच्याशी देखील संपर्क साधण्याचे आवाहन श्रीमंत रामराजे नाईक निंबाळकर यांनी यावेळी केले.