डेंग्यूने घेतला युवकाचा बळी ; नगरपालिका प्रशासनाच्या विरोधात मोर्चा
फलटण (गंधवार्ता वृत्तसेवा) दि. २५ - फलटण शहरात डेंग्यू रोगाने थैमान घातले असून, डेंग्यूने आज फलटण शहरातील दुसरा बळी घेतला आहे, तरीही प्रशासन मात्र ॲक्टिव्ह मोडवर दिसत नाही, शहराच्या ज्या भागातून तक्रारी, आंदोलन किंवा नागरिक आक्रमक होतील, त्याच भागात नगरपालिका प्रशासनाद्वारे फवारणी व स्वच्छता केली जात असल्याचे चित्र दिसत आहे. शहरात कित्येक ठिकाणी पाण्याची डबके साठलेले आहेत, पण याकडे प्रशासन दुर्लक्ष करीत आहे. सध्या झोपडपट्टी भागात फॉग मशीनद्वारे फवारणी केली पाहिजे, मात्र तेच भाग वंचित ठेवले जात आहेत. त्यामुळे नागरिक उठावाच्या भूमिकेत असून, दि. २६ सप्टेंबर रोजी डॉ. बाबासाहेब आंबेडकर जयंती महोत्सव समितीच्या नेतृत्वाखाली नगरपालिका प्रशासनाच्या विरोधात मोर्चा निघणार आहे.
मंगळवार पेठ फलटण येथील किरण राजू काकडे यास डेंग्यू आजाराची लागण झाली होती. त्याच्यावर फलटण येथील खाजगी रुग्णालयात उपचार चालू होते. किरणची प्रकृती गंभीर झाल्यानंतर त्यास पुणे येथे पाठवण्यात आले. काकडे यांची परिस्थिती हालाखीची असल्यामुळे मंगळवार पेठेतील नागरिकांनी वर्गणी काढून पैसे जमा केले व किरणच्या उपचारासाठी पाठवले, परंतु उपचारात यश आले नाही व काल दि. २४ सप्टेंबर २०२२ रोजी पुणे येथे उपचारादरम्यान किरणचा दुर्दैवी मृत्यू झाला.
किरण काकडे च्या मृत्यूस नगरपालिका जबाबदार आहे. किरण काकडे याच्या घराच्या अवतीभवती अस्वच्छतेचे साम्राज्य पसरले असून, वेळेत उपाययोजना केल्या असत्या तर युवकाचा जीव वाचला असता, त्यामुळे मंगळवार पेठेतील नागरिक आंदोलनाच्या भूमिकेत असून, डॉ. बाबासाहेब आंबेडकर जयंती महोत्सव समितीच्या नेतृत्वाखाली नगरपालिका प्रशासनाच्या विरोधात दि. २६ सप्टेंबर रोजी दुपारी १ वाजता मोर्चा काढण्यात येणार आहे.
No comments